Monday, October 8, 2012
වීරයන් මැරීම හා බලු කිරීම
ලෝකයම අද ක්රිකට් ක්රීඩාවේ සිටින හොඳම නායකයා ලෙස ගරු බුහුමන් කරන මහේල ජයවර්ධන නායකත්වයෙන් සමුගැනීම ශ්රීලංකා ක්රිකට් වලට කිසිම ආකාරයකින් පාඩුවක් නොවනු ඇත. මක්නිසාදයත් මහේල සතුවත් නොමැති සුපිරි සැලසුම් ඇති හීනෙන්වත් බෝලයක් බැට් එකක් අල්ලා නොමැති වුවත් හැකියාවෙන් ක්රීඩාශීලීත්වයෙන් අගතැන්පත් පරිපූර්ණ නායකයන්, ක්රීඩකයන් රැසක්ම Facebook හරහා ලෝකයටම හදුනා ගැනීමට අවකාශය ලැබීමෙනි. මහේලගෙන් හිස්වන නායකත්ව පුරප්පාඩුවට ඔව්න්ව ආදේශකල හැකිය.
ලසිත් මාලිංග සම්බන්දවත් ඇත්තේ එම තත්වයමය. මාලිංගත් කන්ඩායමෙන් ඉවත්කර දැමුවාට කමක් නැත. මක්නිසාදයත් කිසිදා ලෙදර් බෝලයක් අල්ලා නැති වුවත් මාලිංගටත් වඩා හොඳින් පන්දු යැවිය හැකි, සුපිරි පන්දුවාර නිලකුනු පන්දුවාර වශයෙන් යැවිය හැකි, මාලිංගටත් පන්දු යවන ආකාරය පිලිබඳ උපදෙස් දිය හැකි පන්දුයවන්නන්, පුහුනුකරුවන් රාශියක්ම Facebook හරහා ලෝකයටම හදුනා ගැනීමට අවස්තාව ඇති නිසාවෙනි.
මේ රටට බලපා ඇති සැබෑ ශාපය මෙයයි. කෙතරම් හොඳ කලත්, ජයග්රහණ ලබාදුන්නත් වැඩක් නැත. අගයක් නැත. එක අතපසුවීමකින් කල කිසිම හොඳ දෙයක් මතක නැත. වැරදුනු තැන අල්ලාගෙන වීරයින් බලු කිරීමට මොහොතක්වත් පමා කරන්නේ නැත. එසේ කිරීමටම දත කට මැදගෙන සිටින පිරිසක්ද බිහිවි ඇත.
